Deustuko Unibertsitateko Komunikazioko graduko ikasleek Mintzolaren egoitza nagusira irteera egin dute. Ahozko komunikazioaren eta bertsolaritzaren mundua gehiago ezagutzeko aukera paregabea izan dute Karlos Aizpuruaren eta Ohiana Aranbururen eskutik.
Maialen Zubillaga, Billabona. Komunikazioko graduko bigarren mailako ikasleek Billabonara egin dute irteera; hain zuzen ere, Mintzola Fundaziora. Bertan, Aizpuruak Mintzola zer den eta nola egituratuta dagoen azaldu du. Bere hitzetan: “Mintzola ahozkotasunaren tradizioa mantentzeko sortua da”. Adierazi du ahozko komunikazioaren formazioa, ikerketa eta hedapena direla Mintzolaren hiru adar nagusiak.
Gerora, ikasleak Aranbururekin izan dira Xenpelar Dokumentazio Zentroa ezagutzen. Bertsolaritza sustatzea, ikertzea eta transmititzea dute helburu. Aranburuk azaldu duenez: “Gure funtsa materiala jasotzea da, gero eskaini ahal izateko. Bizi-bizirik dagoen materiala dugu”. Egun, besteak beste, material analogikoaren digitalizazioan ari dira lanean.
Zerbitzu publikoa eskaintzen dutenez, besoak zabalik jasotzen dute edozein bisita. Gainera, eskaintza berriak dituzte buruan. Proiektu horietako batzuk dira ahozko komunikazioari zuzendutako graduondoaren sorkuntza eta etxeko txikienentzako bertso kanpamentua.
